Bir gün Mələkul movt (Həzrət Əzrail) Həzrət Musanın (ə) yanına gəlir. Həzrət Musa (ə) onu görən kimi soruşur, nə əcəb gəlmisən? Məqsədin mənlə görüşməkdir, yoxsa ruhumu almaq? 

Həzrət Əzrail dedi: Ruhunu almaq. 
Həzrət Musa (ə) anasını və ailəsini görüb vidalaşmaq üçün Həzrət Əzraildən (ə) möhlət istədi. Həzrət Əzrail (ə) dedi: Bu möhləti verməyə icazəm yoxdur. 
Həzrət Musa (ə) dedi: Heç olmasa səcdə etmək üçün biraz möhlət ver. 
Ölüm mələyi bu möhləti verdi. Həzrət Musa (ə) səcdəyə getdi və dedi:
İlahi! Bu ölüm mələyinə əmr et ki, anam və ailəm ilə vidalaşmağa mənə möhlət versin.

Allah Təala Həzrət Əzrailə (ə) əmr etdi ki, Həzrət Musanın (ə) ruhunu almağı təxirə salsın və o da öz anasını və ailəsini görə bilsin. Həzrət Əzrail (ə) Həzrət Musaya (ə) ailəsi ilə görüşmək üçün icazə verir. 
Həzrət Musa (ə) anasının yanına gəlib dedi:
Anacan, səfərə gedirəm, haqqını mənə halal et. 
Anası: Nə səfər? 
Həzrət Musa (ə): Axirət səfərinə! 
Həzrət Musanın anası ağlamağa başladı. Həzrət Musa (ə) anası ilə vidalaşdı və öz arvad uşağının yanına getdi. Onlarla da vidalaşdı. Çox sevdiyi kiçik övladı var idi. Uşaq Həzrət Musanın (ə) ətəyindən yapışıb zar zar ağlayırdı və bu səhnədən Həzrət Musa (ə) da ağlamağa başladı. 

Nida gəldi: Ey Musa! İndi ki, bizim yanımıza gəlirsən, bəs nə üçün bu qədər ağlayırsan?! 
Dedi: İlahi! Uşaqlarımı çox istədiyim üçün ağlayıram. 
Xitab gəldi: Ey Musa! Əsanı dəryaya vur! 
Həzrət Musa (ə) əsasını dəryaya vurdu, dərya aralandı və dəryada ağ daş göründü.

Daşın içində ağzında yaşıl yarpaq və o yarpağı yeməklə məşğul olan çox zəif bir qurd gördü. 

Allah Təala xitab etdi: Ya Musa!
Dəryanın ortasında daşın içində bu cür zəif bir qurdu mən yaddan çıxartmıram. İndi sənin uşaqlarını yaddan çıxaracağam? 

Əmin ola bilərsən ki, Mən onları çox yaxşı hifz edəcəm. 

Bu səhnədən sonra Həzrət Musa (ə) ölüm mələyinə dedi: 
Öz vəzifəni yerinə yetir! 
Beləliklə Həzrət Əzrail (ə) onun ruhunu aldı.