Mübahilə Allah-taala Ali-İmran surəsinin 61-ci ayəsi ayəsində Həzrət Əlinin (ə) Peyğəmbərin (s) özü olduğunu bəyan etmişdir. Allah Özünün bu hökmüylə Həzrət Əlinin (ə) fəzilətlərin ən üstün dərəcəsinə çatdığını, günahlardan qorunma (məsumluq) və kamillik nöqtəsində Peğəmbərə (s) bərabər olduğunu bəyan etmişdir. Allah-taala onu, həyat yoldaşını və iki övladını kiçik yaşlarına baxmayaraq, Peyğəmbər (s) üçün açıq bir höccət, dini üçün açıq bir dəlil olaraq göstərmişdir. Bununla da, İmam Həsən və İmam Hüseynin (ə) onun (Peyğəmbərin) oğulları olduğunu və “qadınları” - deyə xitab etməkdən məqsədin Həzrət Fatimeyi-Zəhra (ə) olduğunu açıq şəkildə ortaya qoymuşdur, çünki Allah rəsulu (s) onu mübahilə məqamına “qadınlarımız” - deyə gətirmişdi.
Dediklərimiz ümmətdən heç kəsin onlara bərabər olmadığı fəzilətlərdir ki, sadəcə onlara xas olunmuşdur. Bu da Həzrət Əlinin (ə) daha əvvəl qeyd etdiyimiz fəzilətlərinə əlavə olunan daha bir üstün fəzilətdir.
(Şeyx Müfid (r), "əl-İrşad", səh 135)

Buna görə də sənə elm gəldikdən sonra, onun barəsində (İsa (ə) haqqında) səninlə mübahisə edən (höcətləşən) kəsə de: «Gəlin biz öz oğullarımızı, siz öz oğullarınızı, biz öz qadınlarımızı, siz öz qadınlarınızı, biz özümüzü, siz də özünüzü (bizim canımız kimi olan kəsləri) çağıraq, sonra bir-birimizə nifrin edək, beləliklə Allahın lənətini yalançılara yağdıraq. (Peyğəmbər (s) bu hadisədəl İmam Həsənlə (ə) İmam Hüseyni (ə) oğulları, Fatiməni (ə) qadın və Əlini (ə) canı kimi «mübahilə»yə, yəni ayədə işarə olunan qarşılıqlı nifrin etmə mərasiminə apardı və kafirlər təslim oldular.) (Ali-İmran, 61)